مقادير العجين يكفي لتحضير ثلاث أقراص من حجم 30سم للواحد
300غ زبدة
200غ سكر ڭلاصي
100غ بيض (بيضتان)
50غ بودرة اللوز
500غ دقيق
الطريقة:
في وعاء العجين؛كنوضعو الزبدة و الدقيق،و نبسبسوهم بالأصابع ديالنا حتى كيترمل العجين،نضيفو بودرة اللوز؛السكر،و نخلطو الكل،و نضيفو البيض و نجمعو العجين بلا ما ندلكوه،نغلفوه بفيلم غذائي و نخليوه يرتاح ليلة كاملة في الثلاجة أو ساعتين على الأقل
مقادير و طريقة تحضير كريما اللوز:
80غ زبدة
80غ سكر ڭلاصي
80غ بودرة اللوز
100غ بيض
80غ قشدة الطبخ
10غ مايزينا
ساشي خميرة
في وعاء العجين،كنوضعو الزبدة،السكر و نخدموهم مزيآآآن،نضيفو بودرة اللوز؛و نستمرو في التطريب،نضيفو القشدة و البيض،نخلطو مزيآان،و نضيفو الخميرة و مايزينا،نستمرو في التطريب حتى نحصلو على سائل خفيف و متجانس؛نوضعوه في جيب الحلواني و نخليوه على جنب
مقادير و طريقة تحضير كريما الحامض (الكمية تكفي لتحضير طورطتين)
200غ عصير الحامض
قشرة 2 حامضات
120غ سكر
صفار 6 بيضات و بيضتان كاملتان
130غ زبدة بحرارة المطبخ
2 ساشي سكر الڤانيلا
في كاسرونة كنوضعو عصير الحامض و سكر الڤانيلا حتى الغلينا؛و في وعاء كنوضعو البيض الكامل و الصفار مع قشرة الحامض و نخفقوهم جيدا؛ناخدو العصير ساخن و نوضعوه فوق البيض،نخلطوهم مزيان،و نرجعو الكل فوق النار مع التحريك حتى يعقد الخليط،و خارج النار نضيفو الزبدة،نحركو مزيآآآآن،و نخليوه يبرد مزيآآان(الأفضل تحضير الكريما ليلة من قبل)
كنلبسو العجين للمول،نتقبوه بفورشيط و نخليوه ليلة كاملة في المجمد(بهاد الشكل كنحتفظو على المنظر ديال الطورطة ديالنا،و ما كاينزلوش الجوانب منين كتكون كطيب)
كنوضعو نصف مقدار كريما اللوز فوق العجين(المقادير المذكورة تكفي لتحضير طورطتين)،نشعلو الفرن ديالنا على درجة حرارة 180°،و منين يسخن و ندخلو الطورطة ديالنا نخفضو الحرارة ل 150°،و نخليوها حتى طيب؛منين تبرد مزيآآن،نوضعو كريما الحامض،و نخليوها تبرد،من بعد نطلعو مورانچ ب100غ بياض البيض و 150غ سكر بسرة عالية و في مدة 8 دقائق،نوضعوها على الطورطة من فوق،و نديرو خربشات بالفورشيط،نضربوها بالشالومو،باش نحصلو على مورانچ مدهبة،أو ندخلوها للفرن مشعول من فوق فقط
تجدر الإشارة أن كريما الحامض المستعملة لا تحتوي لا على جيلاتين،و لا دقيق،و لا نشا "مايزينا"
و بالصحة و الراحة .